რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარმა სამეგრელო ზემო სვანეთის მხარის სახერხი საამქროს მფლობელ მეწარმეებთან სამუშაო შეხვედრა გამართა.

ხე-ტყის გადამამუშავებელი საამქროების მფლობელებმა რეგიონული პოლიტიკისა და თვითმმართველობის კომიტეტის თავმჯდომარეს მიმართეს შუამდგომლობის თხოვნით, რათა გადავადდეს კანონმდებლობის ახალი რეგულაციები, რომლებიც 1 აპრილიდან უნდა ამოქმედდეს.

რამოდენიმე წლის წინ მიღებული მთავრობის N46 დადგენილება საქართველოს ტერიტორიაზე ხე-ტყის მოძრაობის წესებისა და მრგვალი ხე-ტყის (მორის) პირველადი გადამუშავების ობიექტის (სახერხი საამქროს) ტექნიკური რეგლამენტის თაობაზე, რომელიც, მათ შორის, ითვალისწინებს სახერხი საამქროების ვიდეომონიტორინგის სისტემით აღჭურვას.

შეხვედრაზე ზოგადად აღინიშნა, რომ ბოლო წლებში, აღრიცხვიანობის გაუმჯობესების თვალსაზრისით ბევრი რამ გაუმჯობესდა, რაც არის ძალიან კარგი, თუმცა არის გარკვეული რეგულაციები, რომლებსაც მათი აზრით სჭირდება გარკვეული დახვეწა, ხოლო ზოგიერთი რეგულაციის მინიმუმ გადადება, იმიტომ, რომ კოვიდ-სიტუაციამ და ეკონომიკურმა ვარდნამ ხელი შეუშალა მათ ბიზნესსაც და შესაბამისად, დღეს ეს ახალი რეგულაციები ადგილობრივ ბიზნესმენებს მძიმე ტვირთად დააწვებათ. მეწარმეების აზრით, არის კიდევ ზოგიერთი რეგულაცია, რომელთა საერთოდ გაუქმებაც მიზანშეწონილი იქნებოდა.

„ჩვენ ვაპირებთ ვიმუშაოთ შესაბამისს უწყებებთან - ეს არის ფინანსური პოლიცია, საგადასახადო, სატყეო დეპარტამენტი, რათა რეალურად გავერკვეთ რამდენად საფუძვლიანია ის პრეტენზიები, რომლებიც მეწარმეებს აქვთ და შესაბამისად, მივიღოთ ისეთი რეგულაციები, რომ არც იმ შედეგიდან დავიხიოთ უკან, რომელიც აღრიცხვიანობის მოწესრიგებას უკავშირდება, მაგრამ მეწარმეებისთვისაც არ იყოს ეს ახალი რეგულაციები მძიმე ტვირთი“, - განაცხადა სოზარ სუბარმა შეხვედრის შემდეგ.

მეწარმეებთან შეხვედრაში მონაწილეობდნენ ასევე პარლამენტის წევრები ვიქტორ ჯაფარიძე და ანზორ ბოლქვაძე, გარემოსდაცვითი დეპარტამენტის წარმომადგენლები.