სახელმწიფო აუდიტის სამსახურის სოციალური სფეროს აუდიტის დეპარტამენტის უფროსმა, ზაზა შეყილაძემ კომიტეტის წევრებს სპორტულ ფედერაციებში 2014-2019 წლებში ჩატარებული აუდიტების შედეგად გამოვლენილი სისტემური ხასიათის მიგნებები და სამსახურის მიერ მომზადებული რეკომენდაციები წარუდგინა.

მომხსენებლის ინფორმაციით, აღნიშნულ პერიოდში, აუდიტის სამსახურმა ჭიდაობის ეროვნული ფედერაციის, რაგბის კავშირის, ჭადრაკის, ფეხბურთის და კალათბურთის ეროვნული ფედერაციების საქმიანობა და სახელმწიფო ბიუჯეტიდან გამოყოფილი თანხების ათვისების საკითხები შეისწავლა. მისივე განცხადებით, აუდიტის ძირითად მიმართულებებს შესყიდვების ნაწილი, შრომის ანაზღაურება, აქტივების მართვა და შიდა კონტროლის ნაკლოვანებების შესწავლა წარმოადგენდა. ზაზა შეყილაძემ კომიტეტის წევრებს შესწავლის შედეგად გამოვლენილ ნაკლოვანებებზე და დარღვევებზე ინფორმაცია მიაწოდა და მათი აღმოფხვრის მიზნით მომზადებულ რეკომენდაციებზეც ისაუბრა.

აუდიტის სამსახურის მიერ მომზადებულ ინფორმაციასთან დაკავშირებით კომიტეტის წევრებმა მოსაზრებები გამოთქვეს და რეკომენდაციების შესრულების აუცილებლობას გაუსვეს ხაზი. აღინიშნა, რომ აუდიტის სამსახურის მიგნებების და რეკომენდაციების განხილვა სპორტულ ფედერაციებთან ერთად უნდა ჩატარდეს, რომელსაც სპორტის სამინისტროს წარმომადგენლებიც დაესწრებიან.

კომიტეტის წევრების შეფასებით, სპორტული ფედერაციების რიგ ქმედებებში სისხლის სამართლის დანაშაულის ნიშნებიც ვლინდება, რომლებიც ქმედით რეაგირებას საჭიროებენ.

კომიტეტის სხდომაზე სპორტული ინფრასტრუქტურის მართვის ეფექტიანობის აუდიტს და მასობრივი სპორტის განვითარების ეფექტიანობის აუდიტის ანგარიშსაც გაეცნენ.

სხდომაზე განხილული საკითხების მნიშვნელობა კომიტეტის თავმჯდომარემ, მიხეილ ყაველაშვილმა შეაფასა.

„ჩვენი მიზანია, რომ ჩვენს ქვეყანაში სპორტი ბევრად უკეთესი იყოს ვიდრე დღეს არის. სპორტის განვითარება მნიშვნელოვანია არა მხოლოდ უშუალოდ სპორტსმენებისთვის და იმ ადამიანებისთვის, ვინც ამ სფეროში მოღვაწეობს, არამედ თითოეული ჩვენი მოქალაქისთვის, რადგან მას აქვს როგორც სოციალური დატვირთვა, ასევე ეკონომიკური ეფექტი. ქვეყნის განვითარების პროცესში სპორტი არც ერთ სხვა დარგს არ ჩამოუვარდება და მეტიც, ზოგ მათგანს ასწრებს კიდეც. ისიც გასათვალისწინებელია, რომ წლების წინ სრულად მოიშალა სპორტული ინფრასტრუქტურა და სტადიონების და სპორტული მოედნების ადგილას კორპუსები ააშენეს, შესაბამისად, ბევრი რამის კეთება თავიდან დავიწყეთ და ასეთი რეალობა გვაქვს. დაწყებული გვაქვს სპორტის განვითარების პროცესი და ამ საქმეში საინტერესო და მნიშვნელოვანია ყოველი რეკომენდაცია და მოსაზრება, რაც ამ სფეროს წაადგება“, - განაცხადა მიხეილ ყაველაშვილმა.