სპორტისა და ახალგაზრდულ საქმეთა კომიტეტის სხდომა
სპორტისა და ახალგაზრდულ საქმეთა კომიტეტის სხდომაზე საქართველოს ახალგაზრდულ ორგანიზაციათა ნაციონალური საბჭოს მიერ, ახალგაზრდული ორგანიზაციების გამოწვევების და საჭიროებების თაობაზე მომზადებულ დასკვნას გაეცნენ.
კომიტეტის თავმჯდომარის, მიხეილ ყაველაშვილის განცხადებით, ახალგაზრდობის საკითხები და ამ სფეროსთან დაკავშირებული გამოწვევები, კომიტეტის ერთ-ერთ მნიშვნელოვან პრიორიტეტს წარმოადგენს. შესაბამისად, კომიტეტი ყველა დაინტერესებულ ორგანიზაციასთან ერთად მუშაობს, რათა ახალგაზრდებისთვის ისეთი გარემო და პირობები შეიქმნას, სადაც ისინი საკუთარი ხედვების და იდეების რეალიზაციას შეძლებენ.
მისივე თქმით, სწორედ აღნიშნულ ფორმატში - დაინტერესებული მხარეების ჩართულობით წარიმართა ახალგაზრდობის კონცეფციაზე მუშაობა, რომელიც კომიტეტის ინიციატივით მომზადდა.
სხდომაზე ახალგაზრდულ ორგანიზაციათა ნაციონალური საბჭოს ხელმძღვანელმა, ნინო წულაიამ და ორგანიზაციის მკვლევარმა, სალომე დოლიძემ კომიტეტის წევრებს, პრეზენტაციის ფორმით, კვლევის შედეგები გააცნეს.
მომხსენებლების ინფორმაციით, საქართველოს ათივე რეგიონში ჩატარებული კვლევების შედეგად, სადაც 76 სხვადასხვა ახალგაზრდული ორგანიზაცია გამოიკითხა, ის პრობლემები და გამოწვევები გამოვლინდა, რომლებიც ახალგაზრდული ორგანიზაციების წინაშე არსებობს.
კერძოდ საუბარია: ფინანსურ და ადამიანურ რესურსთან დაკავშირებულ გამოწვევებზე, კომპეტენციის ნაკლებობაზე, სამუშაო სივრცის პრობლემაზე, ახალგაზრდულ პოლიტიკასა და მასთან დაკავშირებულ გამოწვევებზე, ახალგაზრდული მუშაკის პროფესიის არარსებობასა და ახალგაზრდული ორგანიზაციების მდგრადობაზე.
პრეზენტაციის წარდგენისას, მომხსენებლებმა თითოეულ გამოწვევასთან დაკავშირებით დეტალური ანალიზი და მიგნებები წარმოადგინეს და მათი გადაჭრის გზებზე ისაუბრეს.
საქართველოს ახალგაზრდულ ორგანიზაციათა ნაციონალური საბჭოს წარმომადგენლებმა აღნიშნეს, რომ კვლევის შედეგები კომიტეტს ახალგაზრდული კონცეფციის სამოქმედო გეგმის მომზადებაში დაეხმარება და კვლევაში წარმოჩენილი პრობლემების ასახვა მოხდება.
სხდომაზე წარმოდგენილ ინფორმაციასთან დაკავშირებით კომიტეტის წევრებმა მოსაზრებები გამოთქვეს და ახალგაზრდული ორგანიზაციების განვითარების და მათი მხარდაჭერის მნიშვნელობა აღნიშნეს.
კომიტეტის თავმჯდომარემ საინტერესო კვლევისთვის და მნიშვნელოვანი მიგნებების წარმოდგენისთვის მომხსენებლებს მადლობა გადაუხადა და კიდევ ერთხელ აღნიშნა, რომ ახალგაზრდული საკითხების და თემების განხილვისთვის კომიტეტი მზად არის ყველა დაინტერესებულ მხარესთან ითანამშრომლოს.
