პარლამენტის თავდაცვისა და უშიშროების და ჯანმრთელობის დაცვისა და სოციალურ საკითხთა კომიტეტების, ასევე, ნდობის ჯგუფის წევრებმა თავდაცვის სამინისტროს სისტემაში არსებული წეროვანის სარეაბილიტაციო ცენტრი დაათვალიერეს.

დეპუტატებმა თავდაცვის უწყების სოციალურ საკითხთა და ფსიქოლოგიური მხარდაჭერის დეპარტამენტის საქმიანობისა და ამოცანების შესახებ პრეზენტაცია მოისმინეს და სარეაბილიტაციო ცენტრის ინფრასტრუქტურას და მატერიალურ-ტექნიკურ ბაზას ადგილზე გაეცნენ. კანონმდებლები რეაბილიტაციის კურსში მონაწილე დაჭრილ და დაშავებულ სამხედრო მოსამსახურეებს შეხვდნენ და უშუალოდ მათგან მიიღეს ინფორმაცია სარეაბილიტაციო პირობების შესახებ. 

„ეს არის სრულიად უნიკალური და უპრეცედენტო სარეაბილიტაციო დაწესებულება, რომელსაც რეგიონში ანალოგი არა აქვს.  ულტრათანამედროვე სამედიცინო და სარეაბილიტაციო აღჭურვილობით, დაჭრილი და დაშავებული სამხედრო მოსამსახურეების და მათი ოჯახის წევრების მოთხოვნებსა და საჭიროებებთან შესაბამისობით, ეს ცენტრი წარმოადგენს თავდაცვის უწყების და ქართული სახელმწიფოს ახალი სოციალური პოლიტიკის ერთგვარ სიმბოლოს და იმ სოციალური პოლიტიკის მკაფიო დადასტურებას, რაც განსაკუთრებულ ზრუნვას ითვალისწინებს ჩვენს სახელოვან სამხედრო მოსამსახურეებზე, ვინც საკუთარი ჯანმრთელობის ფასად იცავდა საქართველოს ერთიანობას და საერთაშორისო მშვიდობას. ამ პროქტისთვის და ქართველი სამხედროების დაფასებისა და მხარდაჭერისთვის, განსაკუთრებული მადლობა, ჩვენს ამერიკელ პარტნიორებს ეკუთვნის“, - განაცხადა პარლამენტის თავდაცვისა და უშიშროების კომიტეტის/ნდობის ჯგუფის თავმჯდომარემ, ირაკლი ბერაიამ.

ახალი სარეაბილიტაციო ცენტრი 2020 წლის 27 იანვარს გაიხსნა. აღნიშნული ინიციატივა წარმოადგენს ქართულ-ამერიკულ ერთობლივ პროექტს, რომლის მხარდასაჭერად აშშ-ის მთავრობამ 4,5 მლნ აშშ დოლარი, ხოლო თავდაცვის სამინისტრომ 1 მლნ ლარზე მეტი გამოყო.  ცენტრი აღჭურვილია ულტრათანამედროვე სამედიცინო და სარეაბილიტაციო ტექნიკით და სრულად პასუხობს დაჭრილი სამხედრო მოსამსახურეებისა და მათი ოჯახის წევრთა მოთხოვნებს.