ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის სხდომა
შერიგებისა და სამოქალაქო თანასწორობის საკითხებში საქართველოს სახელმწიფო მინისტრს, თეა ახვლედიანს მოუსმინეს დღეს პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის სხდომაზე.
მინისტრმა დეპუტატებს წარმოუდგინა ინფორმაცია ჟენევის საერთაშორისო მოლაპარაკებების შედეგების, გამოწვევების და მათზე რეაგირების მექანიზმების შესახებ, ასევე საქართველოს მთავრობის სამშვიდობო ინიციატივის „ნაბიჯი უკეთესი მომავლისკენ“ საფუძველზე, გამყოფი ხაზების ორივე მხარეს მცხოვრებ მოსახლეობას შორის საერთო ინტერესებზე დაფუძნებული სავაჭრო-ეკონომიკური კავშირების ხელშეწყობის მიზნით გადადგმული ნაბიჯების თობაზე.
სხდომა დახურულ ფორმატში მიმდინარეობდა.
„ტერიტორიული მთლიანობის აღდგენისა და დეოკუპაციის საკითხებთან დაკავშირებით შექმნილ დროებით კომისიასთან შევთანხმდით წლის განმავლობაში თანამშრომლობის განრიგზე და გეგმებზე. გადავწყვიტეთ, რომ ჩვენ ხშირად განვიხილავთ თემატურ მიმართულებებს და გვექნება გასვლითი სხდომები ოკუპირებული ტერიტორიების ახლო მდებარე სოფლებში“, - განაცხადა თეა ახვლედიანმა სხდომის დასრულების შემდეგ.
დროებითი კომისიის თავმჯდომარის, გიორგი ვოლსკის თქმით, სხდომაზე იმსჯელეს ჟენევის მოლაპარაკების ფორმატის თაობაზე.
„ვიმსჯელეთ მეორე - სამუშაო ჯგუფში განსახილველ საკითხებზე, რომელიც ჰუმანიტარული და ადამიანის უფლებების თემატიკას მოიცავს. ზოგადად ამ პროცესში შესაძლო განვითარებაზე და დავგეგმეთ განხილვა უფრო ფართო ფორმატით საგარეო საქმეთა სამინისტროს და სხვა უწყებების მონაწილეობით“, - განაცხადა გიორგი ვოლსკიმ.
სხდომაზე პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის თავმჯდომარემ, გიორგი ვოლსკიმ წარმოადგინა ინფორმაცია კომისიის 2021 წლის სამოქმედო გეგმის შესახებ.
სხდომის მუშაობაში მონაწილეობდნენ საგარეო ურთიერთობათა, ევროპასთან ინტეგრაციის, ადამიანის უფლებათა დაცვისა და სამოქალაქო ინტეგრაციის, ჯანმრთელობის დაცვისა და სოციალურ საკითხთა, თავდაცვისა და უშიშროების კომიტეტების წარმომადგენლები.
