პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, დიმიტრი ხუნდაძე გაეროს ბავშვთა ფონდის საერთაშორისო კონსულტანტს, დოქტორს, ლინდა შაკერ ბარბარს შეხვდა. შეხვედრის მთავარ თემას საქართველოში დედათა, ბავშვთა და მოზარდთა კვების სფეროში მარეგულირებელი გარემოს შესწავლის მიზანი წამოადგენდა.

შეხვედრის დასაწყისში დიმიტრი ხუნდაძემ ყურადღება საინფორმაციო საშუალებებში გასულ ინფორმაციაზე გაამახვილა, რომელიც ქვეყანაში გაეროს ბავშვთა ფონდი - Unicef-ის კვლევას შეეხებოდა და რომლის მიხედვითაც, 77 000 ბავშვი შიმშილის ზღვარზეა და წელიწადში შიმშილით 300 ბავშვი იღუპება. კომიტეტის თავმჯდომარემ აღნიშნა, რომ რეალობის მძიმედ წარმოჩენა პოლიტიკურ სპეკულაციას ემსახურება და მართებულია სწორი ტერმინების შერჩევა, ვინაიდან „შიმშილის“ დეფინიცია არ არსებობ, ეს არის არასრულფასოვანი კვების პრობლემა და ამაზე ადექვატური წარმოდგენა პრობლემასაც რეალურად ასახავს, რაზეც გაეროს ბავშვთა ფონდის წარმომადგენლებისგან თანხმობა მიიღო.
შეხვედრაზე მხარეებმა განიხილეს გაეროს ბავშვთა ფონდის მიერ წარმოებული კვლევა -„საქართველოში ნუტრიციოლოგიის პოლიტიკის სფეროში არსებული ხარვეზების ანალიზი“. აღნიშნული კვლევის მიზანია საქართველოში დედათა, ბავშვთა და მოზარდთა კვების სფეროს მარეგულირებელი გარემოს შესწავლა და შედეგად ნუტრიციოლოგიის დარგში ყოვლისმომცველი დღის წესრიგის შემუშავების ხელშეწყობა, რომელიც უპასუხებს ნუტრიციის სფეროში არსებულ საჭიროებებს, გააუმჯობესებს ჯანმრთელობას და სხვა მაჩვენებლებს ქვეყანაში.

დიმიტრი ხუნდაძემ არსებული პრობლემების გადაჭრასთან დაკავშირებით, კომიტეტის აქტიურ ჩართულობაზე და ქვეყანაში არსებულ იმ პროგრამებზე ისაუბრა, რომლებიც კომიტეტის უშუალო მონაწილეობით განხორციელდა. კერძოდ, ფულადი სოციალური დახმარება (საარსებო შემწეობა), დემოგრაფიული მდგომარეობის გაუმჯობესების ხელშეწყობის მიზნობრივი სახელმწიფო პროგრამა, დემოგრაფიული მდგომარეობის გაუმჯობესების ხელშეწყობის მიზნობრივი სახელმწიფო პროგრამა მაღალმთიან დასახლებაში მუდმივად მცხოვრები პირებისათვის, კრიზისულ მდგომარეობაში მყოფი ბავშვიანი ოჯახების დახმარება, მრავალშვილიანი ოჯახების ელექტროენერგიის ვაუჩერის გაცემის პროგრამა და ა.შ.

შეხვედრაზე გაეროს ბავშვთა ფონდის საპილოტე პროგრამის დაწყების საკითხი განიხილეს, რომელიც სკოლებში ბავშვთა კვების საჭიროებების გაუმჯობესებას შეეხება. დიმიტრი ხუნდაძის განცხადებით, აღნიშნულ საკითხთან დაკავშირებით, კომიტეტი უკვე მუშაობს და სხვადასხვა უწყებებთან კოორდინაციით სამუშაო პროცესი გრძელდება. მისივე თქმით, არსებული პრობლემის მოგვარება მნიშვნელოვანი შენატანი იქნება ბავშვთა სიღარიბის დაძლევის და არასრულფასოვანი კვების გაუმჯობესების მიმართულებით.