„ჩვენი მიზანი არის ის, რომ მომხმარებელს მივაწოდოთ ხარისხიანი მედიკამენტი და ამასთან, ის იყოს ხელმისაწვდომი როგორც გეოგრაფიულად ასევე, ფინანსურადაც“, - აღნიშნულის შესახებ ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ, საკანონმდებლო ორგანოში, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრ ეკატერინე ტიკარაძესთან შეხვედრის დასრულების შემდეგ განაცხადა.

მისი განმარტებით, უკვე თვეზე მეტია მუშაობა მიმდინარეობს „წამლისა და ფარმაცევტული საქმიანობის შესახებ“ კანონში განსახორციელებელ ცვლილებებზე, რომელიც მიღებულია 2009 წელს და მას შემდეგ არ განახლებულა.

„ამ ძველ კანონს ჰქონდა თავისი პოზიტიური როლი, მაგრამ ეს დღეს მოძველებულია და იმ გამოწვევებს ვერ პასუხობს. მთავარი მიზანი არის, რომ ჩვენს მომხმარებელს მივაწოდოთ ხარისხიანი მედიკამენტი და ის იყოს ხელმისაწვდომი როგორც გეოგრაფიულად ასევე, ფინანსურადაც. ეს არის კანონპროექტთა მსხვილი პაკეტი. ჩვენ ვმუშაობთ როგორც ადგილობრივ ექსპერტებთან ასევე, ჯანდაცვის მსოფლიო ორგანიზაციის მიერ შერჩეულ ექსპერტთან. გვაქვს საერთაშორისო კომუნიკაციაც, ჩართვებიც. ჩვენ ვამზადებთ ამ კანონს რათა მოვახდინოთ მისი ინიცირება, მაგრამ რა თქმა უნდა ის იქნება ფართო განხილვის საგანი, სანამ წარდგება პარლამენტის წინაშე“, - განაცხადა დიმიტრი ხუნდაძემ.

ეკატერინე ტიკარაძის განცხადებით, „წამლისა და ფარმაცევტული საქმიანობის შესახებ“ კანონპროექტზე მუშაობა ჯერ კიდევ იანვრის თვიდან მიმდინარეობს.

„ჩვენი მოსახლეობისთვის ძალიან მნიშვნელოვანია, საქართველოს ბაზარზე უსაფრთხო წამლის შემოტანა უზრუნველვყოთ. ასევე, მნიშვნელოვანია ფასთა რეგულაციები. დღეს სამუშაო შეხვედრა გვქონდა, სადაც გარკვეული საკვანძო დეტალები განვიხილეთ, მოხდა გარკვეული საკითხების შეჯერება, მუშაობას განაგრძობენ როგორც რეგულირების სააგენტო, ასევე, ჯანდაცვის კომიტეტი. ამ პროცესში მეც სრულად ვიქნები ჩართული. ჩვენ უნდა გავწეროთ გლობალური კანონპროექტი, რომელიც იქნება ქვეყნის სტრატეგია შემდგომი 5-10 წლის მანძილზე. ეს კანონპროექტი პარლამენტში ჯერ არ არის შემოტანილი“, - განაცხადა ეკატერინე ტიკარაძემ.

პარლამენტში ჯანდაცვის მინისტრსა და ჯანდაცვის და სოციალურ საკითხთა კომიტეტის თავმჯდომარეს შორის გამართული შეხვედრა, თითქმის 3 საათის განმავლობაში მიმდინარეობდა.