პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ საქართველოში ვიზიტად მყოფ, ჯანმრთელობის მსოფლიო ორგანიზაციის სპეციალურ მისიას უმასპინძლა. 

შეხვედრაზე მხარეებმა მომხმარებლისთვის მაღალი ხარისხის უსაფრთხო მედიკამენტების მიწოდების და მისი ხელმისაწვდომობის საკითხები განიხილეს. აღინიშნა, რომ ფარმაცევტული სექტორის საკანონმდებლო ბაზა, რომელიც 2009 წლიდან მოქმედებს, უკვე მოძველებულია და თანამედროვე გამოწვევებს ვეღარ პასუხობს. შეხვედრაზე კომიტეტის თავმჯდომარემ და მისიის წევრებმა ქვეყანაში ჯანმრთელობის დაცვის მიმართულებით მიმდინარე რეფორმირების პროცესში, ჯანმრთელობის მსოფლიო ორგანიზაციის ექსპერტთა ჩართულობის შესაძლებლობებიც განიხილეს.

„საერთაშორისო და ადგილობრივ ექსპერტებთან ერთად ჩვენ დავიწყებთ საკანონმდებლო ცვლილებების პაკეტზე მუშაობას, რაც შესაბამისობაში იქნება თანამედროვე გამოწვევებთან. კანონმდებლობის განახლების ძირითადი მიზანია მოსახლეობას მივაწოდოთ ხარისხიანი, ეფექტური, უსაფრთხო მედიკამენტები და ეს ყოველივე მათთვის ხელმისაწვდომი გავხადოთ“, - განაცხადა დიმიტრი ხუნდაძემ შეხვედრის დასრულების შემდეგ.

ჯანმრთელობის მსოფლიო ორგანიზაციის სპეციალურ მისიას, ორგანიზაციის ევროპის რეგიონული ოფისის სამედიცინო ტექნოლოგიების და მედიკამენტების დეპარტამენტის უფროსი, სარა გარნერი ხელმძღვანელობს. მისიაში ასევე შედიან ევროპის რეგიონული ოფისის სამედიცინო ტექნოლოგიების და მედიკამენტების დეპარტამენტის პროგრამის კოორდინატორი, დორინა პირგარი და ჯანდაცვის ეკონომისტი და ჯანდაცვის სისტემების მრჩეველი, ტრინ ჰაბიტახი.